IBYEMEZO BYA KONGRE YA MBERE Y'ISHYAKA P.S.IMBERAKURI  YO KU WA 25 UKWAKIRA 2009

None kuwa 25 Ukwakira 2009 ; Ishyaka P.S.- IMBERAKURI ryakoresheje Kongre ya mbere ; maze hafatwa ibyemezo bikurikira :

Ku bw'umwihariko :

Kongre y'Ishyaka P.S-IMBERAKURI yatoye umukandida uzahagararira Ishyaka mu matora ya Perezida wa Repubulika azaba ku italiki ya 9 Kanama 2010. Umukadinda wemejwe ku mugaragaro ni Maître Bernard NTAGANDA Abdulkarim ; Prezida Fondateri wa P.S-IMBERAKURI

Kongre y'Ishyaka P.S-IMBERAKURI yashyize mu myanya kandi ihindura bamwe mu bagize Komite Nkuru y'Ishyaka P.S-IMBERAKURI ku buryo bukurikira :

1. Pasteri HAKIZIMFURA Noel wari Umunyamabanga Mukuru yasimbuwe kuri uwo mwanya na MUTARAMBIRA Theobald.Nk'uko byasobanuwe na Prezida w'Ishyaka ; Pasteri HAKIZIMFURA Noel araregwa :

- Kutubaha abayobozi b'Ishyaka cyane cyane Perezida Fondateri wa P.S.-IMBERAKURI ;

- Kugambanira Ishyaka ajyana abayoboke baryo mu yandi mashyaka ;

- Gutera umwuka mubi mu Ishyaka agenda avuga hose ko Prezida Fondateri yagambaniye Ishyaka ndetse n'Igihugu asinya amasezerano n'amashyaka agamije guhungabanya umutekano w'Igihugu.

2. DUSABE Claudine wari umunyamabanga ushinzwe gender n'urubyiruko yasimbuwe na BAKUNZIBAKE Alexis. DUSABE Claudine araregwa ubugande mu Ishyaka kuko atajya yitabira amanama kandi ntakore n'imirimo ashinzwe .

Muri Rusange :

Kongre y'Ishyaka P.S-IMBERAKURI yemeje ibi bikurikira :

1. Ishyaka P.S-IMBERAKURI rigomba kujya muri Komisiyo y'Igihugu y'Amatora nk'Ishyaka ritavuga rumwe na Leta ya Kigali ; bitaba ibyo Ishyaka P.S-IMBERAKURI ntabwo rizitabira amatora ya Prezida ateganyijwe.

2. Kongre ya Mbere ya P.S-IMBERAKURI yamaganye bidasubirwaho imikorere y'Inkiko Gacaca kandi isaba ko hajyaho Komisiyo igomba gusuzuma ibibazo by'abantu bose bafunzwe bazira akamama. Hemejwe kandi ko hagomba kujyaho inkiko zigomba gusubiramo imanza zaciwe na Gacaca.

3. Kongre yamaganye ivanwaho ry'igifaransa mu Rwanda kandi bigaragara ko abavuga urwo rurimi aribo benshi mu Rwanda.

4. Kongre yamaganye ibyemezo bya hutihuti bifatirwa abaturage kandi bitabafitiye inyungu, Ingero zatanzwe ni nko gutema insina ; gutera ubwatsi mu bishanga hose, guhatira abantu mu cyo Leta yise UMURENGE SAKO, guhatira abantu kuba intore.

5. Kongre iramagane yivuye inyuma ibikorwa bigayitse byo kuburabuza no kubuza uburyo bamwe mu banyarwanda cyane cyane abategarugori bacuruza ku dutebo ibyo ikabikora yiyibagije ko ntacyo ikora kugira ngo ibakure mu bukene bubugarije.

6. Kongre yasabye ko Leta igomba gukurikirana no kugaruza umutungo w'Igihugu wanyerejwe n'Abayobozi baba bagaragaweho ruswa.

7. Kongre yamaganye itotezwa rikorerwa Abarwanashyaka ba P.S-IMBERAKURI bakomeje kuvutswa uburenganzira bwabo nko kwirukanwa ku kazi no gufungwa bazira gusa ko bayobotse Ishyaka P.S.-IMBERAKURI.

Bikorewe i Kigali ; kuwa 25 Ukwakira 2009

Prezida Fondateri wa P.S.-IMBERAKURI

Maître Bernard NTAGANDA